КОМИАТЫ ДЗАМБОЛАТ

Таурæгъон цуанон, Æфсатийы хæлар. Ирон адæмон сфæлдыстады ис цалдæр зарæджы: «Комиайы-фырт», «Æфсати æмæ Комиайы-фырты зарæг» æмæ æндæртæ. Уым æй хонынц, æссон лæг у, зæгъгæ. Æфсатийæн уыд авд фырты æмæ-иу чызг Хаирхъыз. Йæ фырттæ балцы куы уыдысты, уæд ын йæ чызджы хæйрæг аскъæфта, Æфсати фæфæдис кодта Комиайы-фыртмæ. Уый йæм йæ сыгъзæрин саутæфтыд хæтæлимæ æххуысмæ фæзынд. Æфсати йæм Сафа-уасхæйы бæрзондæй куы ныхъхъæр кæны: «Йæ рахиз уæраджы сæрмæ йын хъав». Ома, йæ мæлæт уымæй у. Комиайы-фырт хæйрæджы амары, — Бæстырæсугъд Хаирхъызы фервæзын кæны. Уæдмæ Æфсатийы авд фырты дæр æрбахæццæ вæййынц æмæ йын зæгъынц, Хуыцау æй дæуæн саккаг кодта æмæ йæ дæхицæн усæн акæн, зæгъгæ. Комиайы-фырт сын куы зæгъы:

«Кæй у, уымæн хæлар уæд,

Уæ хæзна дæр, уæ сыгъзæрин дæр мæ нæ хъæуы.

Уæлæ сау хъæды уæ дæттинаг фосæй мын хай бакæнут.

Бæстырæсугъд Хаирхъызы йæ хо куы ныккæны».

Æфсымæртæ та дзы сæхицæн æфсымæр загътой æмæ йын йæ цуанæн ахъаз кодтой.

кæс «АРВЫ ДУАР»-Ы СÆРГÆНДТÆ